Fábrica de brujas-Sormen kolektiboa antzerki konpainiak gaixotasun baten diagnostikotik abiatuta benetako esperientzia taularatuko du datorren ostiralean, abenduaren 5ean, Getxoko Muxikebarri antzokian. Arantza López aktore eta zuzendariaren proposamena da eta aktore lanetan Itziar Fragua, Leire Ormazabal eta Aiora Sedano aktoreak daude.

Bizipen pertsonal batean oinarrituta Igogailua pieza antzerkia, musika eta argiak uztartzen dituen proposamen eszenikoa da, ikuslea esperientzia sentsorial eta bizigarri batean murgilduko duena.

Protagonista igogailu batean harrapatuta geratzen da. Igogailua ez da igotzen, ezta jaisten ere; aitzitik, inkontzientearen geruza desberdinetan gelditzen da. Espazio horretan, bere pertzepzioa hedatu egiten da eta beste errealitate batzuetara irekitzen da. Bidean zehar, lagunekin partekatzen ditu hainbat eszena: barre egiten dute, aurrez aurre jartzen dira, elkarri eusten diote eta batzuetan hausten ere bai. Elkarrekin zeharkatzen dituzte beldurra, frustrazioa, desioa eta itxaropena.

Ametsaren, aluzinazioaren eta funtsezko egiaren artean, Igogailua tragikomedia garaikidea da, testua eta antzerki fisikoa uztartzen dituena, soinu-paisaia hipnotiko batean bilduta. Esperientzia eszeniko poetikoa, intimoa eta bisuala, eraldaketa-erritu bat proposatzen duena, non ikusezina denak forma hartzen duen, iluntasunean ere argia dagoela gogorarazteko.

Fábrica de Brujas Sormen Kolektiboa duela gutxi sortutako antzerki-konpainia bat da, arte eszenikoetan hogei urte baino gehiagoko ibilbidea duten profesionalek osatu dute. Antzerkiaren hainbat arlotan (interpretazioa, zuzendaritza, dramaturgia, pedagogia, ekoizpena) izandako esperientzia luzeak eta hizkuntza eszeniko berriak aztertzeko kezka sakonak batzen ditu.