Iaz Augustin Zubikarai saria irabazi eta gero, Julen Apella idazle berriztarrak Sakelako bihotzak nobela kaleratu du aurten. Nerabezaroaren eta helduaroaren arteko linboan dauden Jokin eta Felix dira nobelako protagonistak. Z belaunaldikoen argazkia ez ezik, beldurra, maitasuna, komunikazio eza eta halako gai unibertsalak jorratzen dituen lana ere bada Apellarena. Berriztarrak poesiatik eleberrirako jauzia egin du, estilo propioari eutsita. Berrizko Hiltegixe gaztetxean eta Durangoko Hitz liburu dendan aurkezpenak egin eta gero, Durangoko Azokako Ahotsenean ere aurkeztu zuen liburua, abenduaren 8an. Oraindino "goizegi" den arren lanak izandako harrera neurtzeko, Apella pozik dago jasotzen dabilen mezuekin.